ИЗВЕШТАЈ ОД РЕАЛИЗИРАНИТЕ АКТИВНОСТИ ПО ПОВОД ДЕТСКАТА НЕДЕЛА
Децата се нашето најголемо богатство, гордост и нашата иднина. Сите деца имаат еднакви права и на сите треба да им се даде неопходната поддршка и да им се овозможат еднакви можности. Во текот на измината недела наставниците и учениците низ многубројни активности научија, споделија и реализираа содржини кои заеднички ни помогнаа да ги анализираме и да го потенцираме значењето на правата на секое дете.Детската неделата помина во духот на соработка, креативност и развивање на позитивни вредности кај учениците. Децата уживаа во активностите, покажаа ангажираност и креативност, а преку нив го зајакнаа чувството на припадност и меѓусебна почит.
Им посакавме добредојде на нашите првачиња во Детската организација кои даденото ,,Ветување“ заедно го слушнаа и едногласно го повторија.
Мотото „Детето денес – иднината утре!“ беше целосно оправдано преку сите активности кои се фокусираа на развојот, среќата и правата на децата.
Цел на активностите
Целта на активностите во рамки на Детската недела беше да се поттикне:
- Почитување на детските права и одговорности.
- Развивање на вредности како пријателство, хуманост и соработка.
- Активно учество на учениците во создавање позитивна училишна клима.
- Промовирање на детската креативност, мислење и глас.
Активности по одделенија
I одделение – „Јас и моите другари“
- Цртање на тема „Моето другарство“ – децата цртаа себе и своите другари и разговараа за тоа како треба да се однесуваме со другарите.
- Игра „Пренеси ја насмевката“ – секое дете ѝ се насмевнуваше на друго дете, поттикнувајќи добрина и позитивна енергија.
- Игровни активности– меѓуученички натпревари
- Креативна работилница: „Нашето прво знаме“ – учениците создадоа симболично знаме со отпечатоци од раце, срца и цртежи, како знак за нивниот нов почеток како училишни другарчиња.
II одделение – „Правата на децата“
- „Јас имам право…“ – Приказна и илустрација – учениците ги изразија своите права преку пишување и цртање, а изработките беа изложени во училницата.
- Игра „Симбол на правото“ – секое дете измисли гест или знак кој го симболизира едно право (на љубов, игра, учење итн.) и го претстави пред останатите.
III одделение – „Нашето училиште е наш дом“
- Групна работа: Постер „Правила на нашата училница“ – учениците заеднички формулираа правила за соживот и ги претставија визуелно.
- „Писмо до себе“ – секое дете напиша писмо во кое изрази што сака да научи и каков пријател сака да биде. Писмата беа враќани на крајот од неделата.
IV одделение – „Да бидеме хумани“
- „Кутија на добрината“ – секој ученик предложи добро дело кое може да го направи. Секој ден се вадеше едно ливче и се реализираше идејата.
- Мини-книгичка „Нашите добри дела“ – учениците ги документираа своите добри постапки во креативна книшка.
V одделение – „Јас и општеството“
- Флаери за детските права – учениците подготвија флаери со информации за Детската недела, правата на децата и пораки до возрасните. Флаерите беа поделени на првачињата.
- Игра „Детски парламент“ – учениците дискутираа што би промениле во училиштето или заедницата за да станат подобри места за децата.
Заедничка активност
- Организирана приредба и изложба – организирана изложба со сите цртежи, пораки, флаери и постери од учениците од сите одделенија. Настанот беше отворен за наставниците, учениците и родителите.
